Pe’ tutto ‘o cielo cu’ meliarde ‘e stelle
quanno ‘int’’e ssere ‘e maggio, a vintun’ora,
me putarria sunnà cu’ Nenna mia
tutt’’a priezza e ‘o spasemo ‘e ll’ammore.

Invece stongo ‘e casa ‘o quarto piano
sto sprufunnato miez’a stu cemento
addò nun se respira l’aria bbona
senza sape’ che d’è nu sciato ‘e viento.

S’è fatto stritto ‘e pietto pure ‘o sole
accumparisce pe’ nu quarto d’ora
po’ se ne va, quase pe’ nu dispietto;
e io resto cu’ na smania dint’’o core.

E intanto aspetto, comme ‘o puveriello
aspetta ‘a carità, però, va trova...
Comme vurria tene’ nu ciardeniello
cu’ na gallina ca facesse l’ove.